Banorët e fshatit Bec dhe fshatrave tjerë për rreth të zonës së Dushkajës së Gjakovës kishin dy gëzime të mëdha, pritjen e muajit të madhërishëm të Ramazanit dhe faljen e namazit të xhumasë së pare në xhaminë e re të fshatit.

Më datën 14.09.2007, ditën e xhuma, ditën e dytë të muajit të shenjtë të Ramazanit, e cila është një datë që do të mbetet gjatë në kujtesën e banorëve të këtyre fshatrave, është bërë hapja solemne e xhamisë së fshatit Bec KK Gjakovë.

Xhamia është ndërtuar në qendër, zemër, të fshatit, vizavi shkollës fillore të fshatit, ambulancës, Kooperativës dhe zyrës së vendit (për çështje civile). Kjo ka një rendësi të veçantë sepse të gjitha këto institucione janë më se të domosdoshme për një jetë të lumtur, e që gjer më tani u këtyre banorëve u kishte munguar vetëm xhamia, e cila tani me bukurinë e saj e ka ndriçuar tërë fshatin.

Fshati Bec është një ndër fshatrat më të njohur për tolerance ndërfetare ku bashkërisht si anëtarë të një familje vazhdojnë jetën pa kurrfarë problemesh, në të gjitha fushat e jetës dhe në të gjitha momentet, në gëzime dhe pikëllimet e jetës janë pranë njëri tjetrit.

Ideja për ndërtimin e xhamisë ishte dëshirë dhe ëndërr e kamotshme e banorëve këtij fshati, por për shkak të rrethanave të sistemeve - sundimeve shtetërore të atyre kohërave ishte e pamundur një gjë e tillë. Në muajin mars të vitit 2001, imami Shaban ef.Ukshini së bashku me banorët këtyre fshatrave, formuan komisionin prej 7 anëtarësh të cilët në emër të fshatit janë angazhuar lidhur me këtë çështje. Në fillim është gjetur lokacioni - trualli të cilin ua ka dhuruar Kooperativa e Becit - drejtori Zeqë Zeqa, në sipërfaqe prej 0.98,53 ha. Më pas komisioni i porsaformuar bënë kërkesën KBI-së në Gjakovë, për dhënien e lejes së ndërtimit të xhamisë.

Pas marrjes së kërkesës së xhematit në fjalë, KBI në Gjakovë, ka marr përsipër kompletimin e tërë dokumentacionit të nevojshëm, duke filluar nga kontrata mbi dhurimin e tokës, leja e ndërtimit nga ana e Kryesisë BI-së të Kosovës, leja e ndërtimit nga Drejtoria për Planifikim Urban dege Rural në Gjakovë, projektin e xhamisë dhe mbikëqyrësin e punimeve, ky i fundit si projekti dhe mbikëqyrja është kryer në mënyrë vullnetare nga ing.ark Besim Sejfiu.

Pas kompletimit të dokumentacionit të nevojshëm, komisioni i fshatit ka marr iniciativë për fillimin e punimeve ndërtimore gjegjësisht kryerja e themeleve me kontribute vullnetare të grumbulluara nga ana e fshatarëve. Më datën 16.11.01 është bërë duaja e vuarjes së gurthemelit dhe prerja e kurbanit sipas traditës vendore, për fillimin e punëve ndërtimore të xhamisë, ku përveç xhematlinjve kanë marr pjesë edhe përfaqësuesit e KBI-së në Gjakovë, ushtruesi i detyrës së kryeimamit Nazmi ef.Shaqiri dhe Jusuf ef.Elezaj. Punët kanë vazhduar gjer në përfundimin e themeleve, gjatë kësaj periudhe komisioni i fshatit në krye me imamin Shaban ef.Ukshini ka vazhduar punën në gjetjen e donatorit. Tash e kishin me lehte të kërkonin ndihmë sepse punët veç kishin filluar. Pasa kontaktimit me shumë shoqata humanitare arabe, gatishmëri për ndihë tregoi shoqata arabe SJRC nga Arabia Saudite, e cila dhuroi shumën prej 82.000 Euro - 71%. Në këtë projekt kanë participuar edhe këta donatorë: Bashkëfshatarët tanë nga diaspora me 9.135 Euro - 8%, Banorët e fshatit Bec me 16.000 Euro - 16%, banorët e fshatit Zhdrellë 1.862 Euro - 2%, banorët e fshatit Palabardh 1.061 Euro - 1% dhe Këshilli i Bashkësisë Islame në Gjakovë 4.466 Euro -3%. Gjithsejtë shuma e investimeve është 115.071 Euro.

Punët ndërtimore kanë zgjatur gjer në muajin shtator të viti 2007. Pas përfundimit të punimeve janë bërë të gjitha përgatitjet për hapjen solemne të xhamisë. Me këtë rast KBI në Gjakovë gjegjësisht kryetari Fatmir ef.Iljazi, në bashkëpunim me imamin Shaban ef.Ukshinin dhe komisionin e fshatit, kishte organizuar një manifestim solemn për hapjen e kësaj xhamie. Në këtë solemnitet ishin të ftuar përfaqësuesit e Kryesisë BI-së Islame të Kosovës, prof.Ahmet ef.Sadriu zv.kryetar i Kryesisë BI-së të Kosovës, prof.Bahri ef.Simnica, dhe Eshref.ef.Draga, përfaqësuesit e Kuvendit Komunal të Gjakovës, kryetari z.Aqif Shehu dhe kryeshefi i ekzekutivit z.Palë Lekaj, pjesëtarë të TMK-së, pjesëtarë të SHPK-së, KFOR-i Italian, pjesëtarë të tarikatit dhe t ë kishës katolike , xhematlinj dhe banor të shumtë të fshatrave për rreth.

Manifestimin e hapi kryetari i KBI-së Fatmir ef.Iljazi, i cili pas falënderimit të All-llahut dhe dërgimit të salavateve Muhamedit a.s. dhe pas përshëndetjes së të gjithë të pranishmëve tha: Jemi këtu sot në këtë ditë të zgjedhur, në muajin e shenjtë të Ramazanit, për përurimin e xhamisë, e cila ishte ëndërr e kamotshme e besimtarëve të kësaj ane. Tani e tutje kjo xhami së bashku me shkollën do të vazhdojnë të shpërndajnë rrezet e diturisë shpirtërore dhe shkencore te brezat e rinj në këtë fshat i cili ka traditë të lashtë fetare dhe kombëtare. Më pas kryetari i KBI-së e ftoi zv.kryetarin e Kryesisë BI-së të Kosovës prof.Ahmet Sadriun dhe kryetarin e Kuvendit të Komunës së Gjakovës z.Aqif Shehun për të prerë shiritin e inaugurimit të xhamisë..

Pas këtij akti solemn në emër të Kryesisë BI-së të Kosovës foli prof.Ahmet ef.Sadriu: "Kam nderin dhe kënaqësinë e veçantë që në emër të Kryesisë BI-së të Kosovës dhe Muftiut Mr.Naim ef.Tërnava t'ju uroi hapjen solemne të xhamisë dhe meqenëse ky manifestim përkon edhe me muajin e shenjtë të Ramazanit, shfrytëzoj rastin që t'ju uroi nga zemra këtë muaj të madhërishëm duke iu dëshiruar agjërim të lehtë dhe të pranuar. Sot është ditë e shënuar për besimtarët e kësaj ane kur po bëjmë hapjen solemne të kësaj xhamie të bukur. Është e rëndësishme që tani e tutje do të jetojnë së bashku shkolla dhe xhamia, ku gjer më dje - në përfundimin e sundimit të sistemit totalitar kishin qenë shpin për shpine. Xhamia është vend ku do të edukohen brezat e rinj - ardhmëria e kombit tone, prandaj shpresojmë se edhe kjo xhami do të luaj këtë rol, ta luaj të njëjtin rol që e kanë luajtur edhe shkollat tjera, e që luan edhe kjo shkollë që është në afërsi dhe karshi xhamisë. Gjithashtu shpresojë se kjo xhami e bukur do të hijeshohet dhe zbukurohet edhe më shumë në të ardhmen, sikur sot, me prezencën tuaj në faljen e namazeve të rregullta ditore, si dhe duke prezantuar në ligjërata të cilat do të ndikojnë në ngritjen e vetëdijes fetare dhe kombëtare"

Në emër të shoqatës humanitare SJRC - donatorit foli drejtori, i cili falënderoi Allahun xh.sh. që na bëri të mundur që të kontribuojmë në ndërtimin e kësaj xhamie. Lus Allahun që këso xhamish të bukura të ndërtojmë prapë.

Në emër të KK-së së Gjakovës fjalën e morri kryetari z.Aqif Shehu: "Sot është ditë e madhe dhe e lumtur për besimtarët e kësaj ane. Është kënaqësi e papërshkrueshme kur besimtarët qetësojnë shpirtrat e tyre në faltoret e Zotit". Kryeshefi z.Palë Lekaj: "Jam shumë i privilegjuar dhe i nderuar që sot gjendem këtu në mesin tuaj, në hapjen solemne të kësaj shtëpie të Zotit".

Në emër të fshatit foli imami Shaban ef.Ukshini: i cili i përshëndeti të gjithë të pranishmit e në veçanti, zv.kryetarin e Kryesisë BI-së të Kosovës prof.Ahemet ef.Sadriun, KBI-së të Gjakovës - Kryetarin Fatmir ef.Iljazin, Donatorin nga Arabia Saudite SJRC, KFOR-in Italian për rregullimin e infrastrukturës, dhe të gjithë donatorët të cilët kontribuuan për ndërtimin e xhamisë dhe mysafir të tjerë.

Kjo është një ngjarje e madhe dhe më e lumtura në jetën time, është gëzimi më i madh për mua personalisht dhe realizmi i dëshirës time të vetme në jetën time. Kjo është një kënaqësi që nuk mund të përshkruhet me fjalë.

Pas përfundimit të ceremonisë me thirrjen e ezanit nga ana e imamit Shaban ef.Ukshini, filloi falja e namazit të xhumasë së pare në xhaminë e re, hutben e mbajti Bahri ef.Simnica, Kurse namazin e xhumasë e fali Ahmet ef.Sadria. Këshilli i Bashkësisë Islame në Gjakovë, në bashkëpunim me këshillin e xhamisë së fshatit kishin organizuar një iftar solemn për mysafirët në hotelin "Pashtrik" të Gjakovës, ku morën pjesë mysafirët e nderuar dhe xhematlijn të shumtë nga fshatrat dhe qyteti i Gjakovës. Pas përfundimit të Iftarit u ndanë mirënjohje për të gjithë ata që kontribuuan në ndërtimin e xhamisë.

 

Përgatiti: Esat ef. Rexha

 

 

 

 

 

 

 

 

 

 

 

.

 

 

 

 

 

 

 

 

Esat ef. Rexha

 

17.09.2007.islamgjakova.net