Aktivitete

Në fshatin Blinisht ish Lipovec, KK Gjakovë, u bë inaugurimi i fillimit të punimeve në ndërtimin e xhamisë

Me datën 10.09.07 (ditën e hëne) në fshatin Blinishte ish Lipovec të zonës së Hasit, KK Gjakovë, në të cilën përfshihen dymbëdhjetë fshatra të kësaj komune, ishte ditë e veçantë sepse këtë ditë solemnisht filluan punimet në ndërtimin e xhamisë.

Për herë të parë që nga ardhja e islamit, dymbëdhjetë fshatra të zonës së Hasit të komunës së Gjakovës do të bëhen me objekt të xhamisë. Në ish fshatin Lipovec tashmë Blinishtë është bërë inaugurimi i fillimit të punimeve të këtij tempulli fetarë i financuar nga shoqata për bamirësinë njerëzore e Bahrenit përmes shoqatës 'Kosova Aid development'.

Në këtë solemnitet madhështor dhe historik për hasjanët e Komunës se Gjakovës, ishin ftuar kryetari i Kryesisë së Bashkësisë Islame të Kovës Myftiu i Kosovës Mr.Naim ef.Ternava, Intelektual, përfaqësues të shoqatave qeveritare dhe joqeveritare, udhëheqësit e administratës komunale të KK të Gjakovës dhe të asaj qendrore të Kosovës, përfaqësues të TMK-së, përfaqësues të SHPK-së, të KFOR-it, imamët dhe të punësuarit tjerë të KBI-së, përfaqësues të pjesëtareve te tarikatit, përfaqësues të kishës katolike, xhematlinj të shumtë dhe mysafirë të tjerë.

Në fillim u bë inaugurimi i punëve ndërtimore në objektin e xhamisë, të cilën e beri zëvendës kryetari i Kryesisë të BI-së së Kosovës Prof. Ahmet ef.Sadria, ku morën pjese edhe kryetari i KBI-së të Gjakovës Fatmir ef Iljazi, z.Pal Lekaj kryeshef i Ekzekutivit të KK-së në Gjakovë, dhe Bedri ef.Kida, duke u shoqëruar me tekbire nga të pranishmit.

Pas këtij akti solemn të pranishmëve mirëseardhjen u uroi kryetari i KBI-së të Gjakovës z.Fatmir ef.Iljazi, i cili falënderoi z.Halil Berishën nga fshati Blinisht - Lipovec i cili dhuroi tokën, donatorët shoqatën arabe për bamirësi nga Bahrejni, IMN "NIKI-S" pronar z.Skender Bajrami, z.Sadik Berishën nga fsh.Gerqinë, N.T. "AS-COM" të familjes Karakushi, Mulla Bedri ef.Kiden, i cili është angazhuar me tërë qenien e tij për ndërtimin e këtij objekti, projektuesin ing.ark. Arben Shabanin, H.Mustafa Gjurgjeallen Ing.ark. i cili ka premtuar mbikëqyrjen e punimeve, dhe shumë donatorë tjerë që ndihmuan dhe që do të ndihmojnë në ndërtimin e këtij objekti fetar. Në vazhdim kryetari i KBI-së të Gjakovës ia dha fjalën përfaqësuesit të Kryesisë së Bashkësisë Islame të Kosovës Prof. Ahmet ef Sadriut i cili tha: "Vërtetë është një ditë madhështore për këtë pjesë të Gjakovës dhe të Kosovës për këtë vend ku gjatë historisë së saj i mungoi një shtëpi e tillë, një tempull, një vend, ku do të bëhet adhurimi i Allahut xh.sh. i Krijuesit të gjithësisë në formën siç ne e bëjmë. Me fillimin e punimeve të këtij tempulli fetar, nga i cili tempull do të rrezatojnë dhe do të promovohen vlerat më të larta morale të islamit dhe të njerëzimit në përgjithësi, nga të cilat vlera vlen të theksojmë afërsinë dhe vëllazërimin e njerëzve në përgjithësi paqen dhe tolerancën."

Më pas të pranishmëve iu drejtua përfaqësuesi i shoqatës arabe Abdulaziz Ibrahimi i cili tha: "Ajo që e bënë edhe më madhështore fillimin e punimeve për ndërtimin e kësaj xhamie është fakti se ky solemnitet shënohet pakë ditë para fillimit të muajit të shenjtë të Ramazanit. E falënderoj Allahun që na ka mundësuar fillimin e punimeve për këtë xhami dhe jam i lumtur që këto vepra po realizohen në muajin Shaban dhe ju përgëzoj me ardhjen e muajit më madhështor muajit të Ramazanit."

Pastaj kryetari i KBI-së ia kaloi mikrofonin kryeshefit të ekzekutivit në KK-së ne Gjakove, Dr.Pale Lekaj. "Jam shumë i privilegjuar që gjendem sot këtu në mesin tuaj në ketë solemnitet me të vërtetë madhështor. Mendoj që ata që e fuqizojnë këtë objekt janë xhemati, sepse ne mund të ndërtojmë xhamia dhe kisha të bukura, por atë që e bënë funksionale janë besimtarët, prandaj mendoj që kjo ndërtesë do të jetë për të gjithë qytetarët që besojnë dhe luten për të ardhmen, për një perspektiv që mbretëron në këtë popull. Ju premtoi se do ta keni përkrahjen e te gjitha institucioneve te KK-se dhe timen personale."

Në ndërtimin e objektit të kësaj xhamie e cila pritet të inaugurohet brenda tre muajsh kanë ndihmuar edhe banorët e fshatit të cilët edhe organizuan këtë solemnitet madhështor.

Përgatiti Esat Rexha