Më datën 31.05.2007 në ora 16:00 Myftiu i Kosovës Mr. Naim ef. Tërnava, me bashkëpunëtorët e vet, Prof. Ahmed ef Sadriun, Rexhep ef. Lumen, Nexhmedin ef Hoxhën, kryetar i KBI-së në Pejë, Ali ef. Vezaj kryetar i KBI-së në Prizren, Hasan ef. Salihu nëpunës administrativ i KBI-së në Prizren, Eshref ef. Draga, bënë vizitë pune në KBI-së në Gjakovë - në Institutin për memorizimin e Kur'anit "Medreseja e Madhe" në Gjakovë.

Myftiu Tërnava, në fillim u prit nga kryetari dhe kryeimami i KBI-së Fatmir ef. Iljazi, me stafin e tij të administratës, sekretarin Esat ef. Rexha, kryeredaktorin e bibliotekës Bedri ef. Kida, Visar ef. Koshi dhe Pleurat ef. Krasniqi.

Pasi që e përshëndeti dhe i uroi mirëseardhje Myftiut të Kosovës, kryetari i KBI-së në Gjakovë e njoftoi shkurtimisht për të arriturat dhe pengesat që e përcollën KBI-së gjatë vitit 2006. Më tutje, kryetari i KBI-së Fatmir ef. ljazi, e njoftoi me fushëveprimin e jetës fetare në komunën e Gjakovës, duke cekur se me punën e pa lodhshme të të gjithë stafit të KBI-së ka arritur që në vitin paraprak të mos mungojnë sukseset. Gjatë vitit 2006 KBI në Gjakovë, në bashkëpunim me Departamentin e Gruas të Kryesisë të BI-së të Kosovës, ka organizuar tribunë fetare në pallatin e kulturës "A. Vokshi" në Gjakovë, me motrat, nënat dhe gratë Gjakovare, për herë të parë në Kosovë, kjo ka pasur sukses shumë të madh gjë që është reflektuar me pjesëmarrjen e një numri të konsideruar të femrave, mbi 500 veta. Janë organizuar kurse verore me të rinj. Pas përfundimit të kurseve janë organizuar vikende me fëmijë. Ndërtimi i dy komplekseve banesore, njëra në qendër të qytetit dhe tjetra në lagjen Sefë 2. Hapja e librarisë Islame. Përfundimi i punimeve në rindërtimin e xh. së Hadumit, hapja e qendrës për hife, fillimi i ndërtimit të xhamisë në fshatin Lipovec, rindërtimi i minares së shkatërruar gjatë luftë së fundit në fshatin Rogovë të Hasit, kërkimi i donacioneve për rindërtimin e xhamisë së Fetah Agës dhe xhamisë Qyl në Gjakovë etj.

Përveç sukseseve të cekura ka pasur edhe vështirësi gjatë punës fetare të vitit paraprak. Këto vështirësi nuk janë manifestuar vetëm në KBI-së të Gjakovës, por edhe në KBI-të tjera në Kosovë, për këtë dihet se për momentin Kosova ende nuk e ka fituar Statusin a pavarësisë, e me këtë kuptohet se kemi pengesa ligjore për realizimin e të drejtave tona, kur themi këtë e kemi fjalën te mosfunksionimi i ligjit, mosefikasiteti i gjyqit, kriza ekonomike, mungesa e kuadrit, mosrealizimi i qëranave etj. Muftiu Tërnava tha se e sotmja është më e mirë se e djeshmja, e nesërmja do të jetë më e mirë se e sotmja. Është punuar, por nuk duhet të kënaqemi me këtë që kemi arritur. Na duhet punë shumë e madhe për t'i përballuar sfidat e jetës. Jemi dëshmitar se kohët e fundit e kemi një sukses sa i përket rritjes së numrit të xhematit me të rinj, të cilët i mbushin xhamitë. Kjo është një kënaqësi edhe na jep elan që të punojmë edhe më tepër, jo vetëm në qytetin e Prishtinës, por edhe në qendrat tjera të Kosovës.

 

MUFTIU NAIM EF. TËRNAVA NË VIZITË INSTITUTIT PËR MEMORIZIMIN E KUR'ANIT - HIFZIT "MEDRESEJA E MADHE NË GJAKOVË

Kryetari i KBI-së në Gjakovë, Fatmir ef. Iljazi, e shoqëroi Myftiun Tërnava në një vizitë të shkurtë në qendrën për hifz "Medreseja e Madhe", ku u prit nga koordinatori i shoqatës kulturore "Istambull" nga Turqia hfz. Idriz Keskin, me personelin e Qendrës, mësimdhënësit, Visar. Ef. Koshi, Pleurat ef. Krasniqi, Enes ef. Koshi, Munir ef. Salkurti.

Myftiu Tërnava u njoftua për punën që bëhet në këtë qendër, e cila është e vetmja e këtij lloji në Ballkan. Numri i nxënësve është 28, shumica prej tyre janë nga Drenica. Në këtë qendër mësohen të gjitha lëndët fetare sipas programit të Medresesë së Mesme "Alaudin në Prishtinë". Mësimet e lëndëve fetare mbahen nga personeli - imamët e KBI-së, kurse lëndët shkencore dhe shoqërore nga profesorët e shkollave të mesme. Nxënësit kanë të rregulluar fjetjen, ushqimin, udhëtimin në vikend në shtëpi. Iu mundësohet dhënia e provimeve private në Medresenë e Mesme "Alaudin" në Prishtinë, pa kompensim. Në vazhdim delegacioni vizitoi objektin e Medresesë, dhomat e fjetjes, klasat e mësimit, mesxhidin, kabinetin e informatikës, objektet tjera përcjellëse dhe prezantoi në orën e mësimit të Kur'anit, me ç'rast disa nga nxënësit lexuan nga një pjesë të Kur'anit.

Myftiu u nda shumë i kënaqur me punën dhe organizimin e punëve në këtë qendër dhe i porositi nxënësit që të angazhohen në maksimum për të arritur suksese sa më të mira dhe njëherit për të mos e quar mundin kot të institucionit i cili me mund të madh arrin që t'i siguroi mjetet për punën normale të Institutit. Myftiu Tërnava dhe zëvendëskryetari i BIK Sadriu edhe njëherë deklaruan se Instituti në fjalë është dhe do të mbetet pjesë e Kryesisë së Bashkësisë Islame të Kosovës duke pas parasysh se kjo e fundit ishte ajo që e kishte dhënë pëlqimin dhe kishte kontribuar për hapjen e saj si dhe në mënyrë të vazhdueshme kishte përcjellë punën dhe rezultatet e dala nga ky institut. Në të njëjtë kohë myftiu siguroi nxënësit se BIK do të vazhdojë të angazhohet në ruajtjen e identitetit të objektit të "Medresesë së Madhe" e cila ndër shekuj me radhë ishte vatër arsimi dhe kulture në tërë trevat shqiptare. Në vazhdim Myftiu i siguroi edhe njëherë nxënësit se nuk kanë nevojë të brengosen, dhe i nxiti ata që të vazhdojnë të m ësojnë në mënyrë që ky institut të prodhojë kuadro të përgatitura profesionale çfarë me të vërtetë i duhen shtetit tonë të ardhshëm.

Pas vizitës, koordinatori i shoqatës kulturore Hfz. Idriz Keskin bashkë me kryetarin e KBI-së në Gjakovë, kishin përgatitur një drekë solemne për mysafirët. Në fund Myftiu Tërnava duke u përshëndetur me stafin e KBI-së dhe të Institutit, iu uroi sukses në të ardhmen.

 

Esat ef. Rexha

 

 

05.06.2007.islamgjakova.net