Më datën 20.05.2007 ditën e diele, këshilli i xhamisë së fshatit Rogovë, në krye me imamin e zellshëm Rrahman ef. Hoxhën, organizuan një manifestim për nder të vënies së gurëthemelit të rindërtimit të minares së xhamisë së fshatit, të cilën forcat serbo çetnike e kishin rrënuar me themel më 15.05. të v.1999.

Xhamia e Rogovës së Hasit është ndërtuar në v.1580 nga Hasan Aga Jemishçiu, i lindur në v.1535 po në këtë fshat, vdiq në v.1603, i cili përveç xhamisë ndërtoi imaretin përskaj xhamisë, Hamamin (që tani nuk ekziston më), ndërtoi 3 ura, tre mullinj, kullën e gurit e shumë objekte tjera afariste si dhe kishte shtruar 3 km rrugë me kalldrëm, dhe kishte hapur kanalin për ujitjen e tokave prej lumit Drini i Bardhë.

Banorët e Rogovës së Hasit me rrethinë sot kishin një gëzim të pa përshkueshëm sepse pas shumë kërkesave dhe lutjeve që Rogovasit ia kishin drejtuar institucioneve lokale dhe atyre qendrore, për rindërtimin e minares së xhamisë, qoftë atyre fetare dhe shtetërore, kishin hasur në vesh të shurdhër, dhe ja sot i erdhi radha që kërkesa e tyre të bëhet realitet.

Në këtë manifestim - ceremoni solemne morën pjesë xhematlinj të shumtë të Rogovës, biznesmen, drejtori i shkollës fillore me personelin arsimor, intelektual dhe banorë të shumtë të fshatrave për rreth, të pranishëm ishin kryetari i KBI-së të Gjakovës, Fatmir ef. ljazi me bashkëpunëtorët Bedri ef. Kida dhe Esat ef. Rexha, përfaqësuesit te KBI-së të Rahovecit, Halit ef. Shala sekretar dhe Is-hak ef. Rexhepi, ish imami i kësaj xhamie Xhemajli ef. Bytyqi dhe Fetah ef. Bekolli si dhe imam të fshatrave për rreth, drejtori i IMKK të Gjakovës Ing. Osman Gojani dhe Ing. Agron Lama.

Këshilli organizativ i xhematit në krye me imamin kishin përgatitur, sipas traditës vendore prerjen e dy kurbaneve për nderë të mysafirëve dhe fillimit të punimeve si dhe kishin përgatitur një drekë me ushqim tradicional të anës së Podrimës. Pas këtij akti u vu gurëthemeli i rindërtimit të minares së xhamisë, të cilën e bëri kryetari i KBI-së të Gjakovës Fatmir ef. Iljazi, më pas u lexua një ashere e Kur'anit nga ana e Esat ef. Rexhës, kurse lutjen e bëri ish imami i kësaj xhamie Xhemajli ef. Bytyqi.

Në vazhdim kryetari i KBI-së e mori fjalën, i cili pas falënderimit të All-llahut xh.sh. dhe dërgimit të salavateve Muhammedit a.s. tha: "Më lejoni që me respektin më të thellë t'ju përshëndes dhe njëkohësisht t'ju përcjellë urimet dhe përgëzimet më të përzemërta në emër të Kryesisë Bashkësisë Islame të Kosovës respektivisht të kryetarit Mr. Naim ef. Tërrnavës, me rastin e fillimit të punimeve në rindërtimin e minares së këtij objekti fetar i cili për shekuj me radhë ishte vatër e fesë, arsimit dhe kulturës dhe djep i diturisë dhe që stoikisht diti t'u bëj ballë sfidave të kohës nga më të ndryshmet përfshirë këtu edhe luftën e fundit barbare në këto treva. Falënderoi All-llahun xh.sh. që më në fund pas shumë kërkesave dhe lutjeve që iu kemi parashtruar donatorëve dhe shoqatave humanitare të ndryshme, Institutit për Mbrojtjen e Monumenteve të Kulturës në Gjakovë, Ministrisë së Kulturës,etj. më në fund t'ia arrijmë qëllimit për fillimin e punimeve në rindërtimin e minares së kësaj xhamie kaq të bukur dhe impozante e cila ka vlera të mëdha fetare, kulturore, historike dhe kombëtare.

Është një meritë e madhe edhe për Qeverinë e Kosovës gjegjësisht për Ministrinë e Kulturës, Rinisë dhe Sporteve të Kosovës, se për herë të parë nga periudha e pasluftës premton se do participojë në investimin e rindërtimit të një objekti fetar të besimit Islam. Një falënderim të veçantë iu shpreh banorëve të fshatit Rogovë, të cilët asnjëherë nuk hezituan që të kontribuojnë në forma të ndryshme për vijimin e punimeve..."

Në vazhdim, Fatmir ef. Iljazi me disa citate nga Kur'ani dhe thënie profetike nxiti dhe apeloi të pranishmit që edhe më tej të manifestojnë bujarinë e tyre, duke cekur rëndësinë e dhënies së sadakasë dhe vlerën e ndërtimit të xhamive. Fjalimin e tij modest Kryetari e përfundoi me: "Pata nderin dhe kënaqësinë që sot isha në mesin tuaj, Ju përgëzoi për këtë organizim kaq të bukur, ju gjithmonë keni ditur të organizoni, të respektoni dhe të nderoni. Ju dëshiroi sukses dhe punë të mbarë, All-llahu Ju dhuroftë mirësi në këtë dhe në botën tjetër....". Ceremonia vazhdoi edhe më tej me fjalime të imamëve dhe mysafirëve tjerë.

Lusim All-llahun e Madhërishëm që këso ceremonish për aksione të tilla të kemi më shpesh.

 

 

Esat ef. Rexha

 

 

24.05.2007.islamgjakova.net