Ta njohim profetin tonë - Muhammedin s.a.v.s.

 

Me datë 12 prill 2008, në sallën solemne në Pallatin e Kulturës "Asim Vokshi", në Gjakovë, u mbajt tryezë fetaro - shkencore për personalitetin e Muhammedit s.a.v.s. me titull: "Ta njohim profetin tonë - Muhammedin s.a.v.s."

Kjo tryezë u organizua nga Këshilli i Bashkësisë Islame të Gjakovës, ku morën pjesë Kryeimami i Kosovës, Sabri ef. Bajgora, Akademik Pajazit Nushi, Dr. Ali F. Iljazi, Mr. Besa Ismaili, Dr. Milazim Krasniqi, si dhe shumë e shumë intelektual nga Gjakova dhe vendet tjera të Kosovës.

Tryeza u hapë me disa vargje nga Kur'ani fisnik të recituara nga koordinatori i shoqatës "ISTANBUL" nga Turqia, Hfz. Idris Keskin, ku më pas konferencieri Munir ef. Salkurti ftoi Kryetarin e Bashkësisë Islame të Gjakovës, Mulla Fatmir ef. Iljazin të merr fjalën, me ç'rast iu drejtua të pranishmëve në sallë me fjalën përshëndetëse duke iu uruar mirëseardhjen pjesëmarrësve dhe duke e shpallur të hapur.

Konferencieri më pas prezanton Kryeimamin e Kosovës, Sabri ef. Bajgorën i cili lexoi kumtesën: "Njeriu që ndryshoi rrjedhën e historisë", ku në mënyrë mjaftë përmbledhëse dhe të qartë Kryeimami foli rreth personalitetit të Muhammedit, a.s. si lider, si profet, si reformator, etj.

Në vazhdim, Akademiku Pajazit Nushi, foli për personalitetin e Muhammedit a.s., nga profili psikologjik, i cili me një qasje shkencore dhe tejet të bukur iu ofroi të pranishmëve një nuancë nga jeta shumë domethënëse e Profetit Muhammed, paqja e Zotit qoftë mbi të.

Në vazhdim të programit për nder të Pejgamberit a.s., u recitua një poezi mjaftë aktuale e titulluar: "Mos e shani Muhammedin a.s." nga aktori Betim Shehu (autor-Sedat Islami).

Pas vargjeve të bukura, auditoriumi patën nderin të dëgjojnë të mirënjohurin Dr. Ali Iljazi, me një qasje nga mjekësia profetike e Muhammedit a.s., ku ishin mjaftë interesante edhe të rejat e fundit shkencore që përputheshin në mënyrë perfekte me Kur'anin fisnik si dhe një nderim që iu bë dijetarit të shquar Hfz. Ibrahim Dalliut me disa vargje poetike që në mënyrë mjaftë brilante doktori i nderuar transmetoi mjaft emocion auditoriumit.

Për të shtuar edhe një ngjyrë në ylberin e kësaj tryeze, Mr. Besa Ismaili, shpalosi të vërteta mjaft interesante rreth qëndrimit të profetit Muhammed a.s. ndaj gruas, ku në një mënyrë mjaftë koncize shpalosi detaje nga jeta e bashkëshorteve të tij të nderuara apo siç i njeh Islami, nëna të besimtarëve, rëndësinë, ndikimin dhe rolin e tyre në shoqërinë e sotme bashkëkohore.

Konferencieri më pas prezantoi edhe ligjëruesin e fundit, Dr. Milazim Krasniqi me temën: "Një mesazh i përhershëm për tërë njerëzimin", i cili në fund të gjithë mysafirëve u shpërndau falas librin e fundit të tij të botuar: "Islami i keqkuptuar dhe fatkeqësia botërore" .

Në fund, me recitimin e vargjeve nga Hytbeja lamtumirëse e Muhammedit a.s. nga Betim Shehu, (autor-Mr.Ismet M.Hasani) ) tryeza përfundoi duke falënderuar Allahun e Madhërishëm, si dhe të pranishmit që morën pjesë në këtë tryezë nga ana e konferencierit Munir ef. Salkurti.

 

Fjalimin e kryetarit të KBIGJ-së dhe temat e mysafirëve mund t'i lexoni më poshtë:

Fjalimi i Kryetarit të KBI të Gjakovës Fatmir ef.Iljazi
Njeriu që ndryshoi rrjedhën e historisë (Mr. Sabri Bajgora)
Profili Psikologjik i Profetit Muhammed a.s. (Prof.Dr.Pajazit Nushi)
Mos e shani Muhammedin a.s. (recitoi Betim Shehu)
Begati e shëndetit nga këndvështrimi i Muhammedit a.s. (Prim.Dr.med.sci. Ali F.Iljazi)
Qëndrimi i Muhammedit a.s. ndaj grave (Mr.Besa Ismajli)
Një mesazh i përhershëm për tërë njerëzimin (Dr. Milazim Krasniqi)
Lamtumira e Profetit Muhammed a.s. (recitoi Betim Shehu)

 

 

Përgatiti:
Ardian Kurhasani
Gjakovë, prill 2008

 

 

 

 

15.04.2008.islamgjakova.net