Podgoricë, 9 mars 2008 - Në takimin e fundit të Reis ul Ulemave të vendeve ballkanike që u mbajt në Podgoricë të Malit të Zi, edhe një herë u diskutua rreth çështjeve më të rëndësishme me të cilat përballen Bashkësitë Islame të vendeve ballkanike.

Në këtë takim morën pjesë krerët fetarë dhe udhëheqësit e Bashkësive
Islame të: Turqisë në krye me Prof. Dr. Ali Bardakoglu dhe zëvendësit të tij Mehmed Gjyrmez, nga Maqedonia delegacionin e udhëhiqte Reis ul Ulema H. Sulejman ef. Rexhepi, nga Kosova - Mufti Naim Tërnava, nga Bullgaria - Mufti Mustafa Alish, nga Shqipëria H. Selim Muça, nga Greqia zona e Thrakisë kishte dy përfaqësues, nga qyteti Skeçe ishte H. Ahmet Mente, ndërsa nga qyteti i Gymulxhinës ishte H. Ibrahim Sherif.

Bashkësia Islame e Malit të Zi edhe pse me një numër më të vogël të besimtarëve islamë (rreth 120 mijë) ishte nikoqire e këtij takimi. Fillimisht kjo përbënte një simbol shprese dhe ngritje morali për të gjithë muslimanët që jetojnë në këtë vend, por edhe si një dëshmi për përpjekjet që i ka bë Qeveria e Malit të Zi, për ta përmirësuar bashkëjetesën dhe tolerancën fetare mes etnive që jetojnë në këtë vend.

Takim e hapi nikoqiri i kësaj mbledhje Kryetari i Bashkësisë Islame të Malit të Zi Rifat Fejziç i cili u dëshiroi mirëseardhje të gjithë të pranishmëve në këtë takim. Ai shprehu kënaqësi të madhe sepse për herë të parë në vendin e tij qëndronte Shehu Islam dhe prijësit e Bashkësive Islame të vendeve Ballkanike. Fillimisht të gjithë të pranishmit ia uruan Kryetarit të Bashkësisë Islame të Kosovës, Mufti Naim Tërnavës, pavarësimin e shtetit më të ri të Botës - Republikën e Kosovës, duke i dëshiruar atij dhe Shtetit të tij përparim dhe sukses në të ardhmen. Më pas fjalën e mori Kryetari i Bashkësisë Fetare të Turqisë Prof. Dr. Ali Bardakoglu, i cili e përsëriti edhe një herë, se ky takim, ashtu siç ishte ai i Sofjes para disa muajve, nuk kanë asnjë qëllim politik apo ndonjë prapavijë të prapshtë, por bëhen me qëllim që miqtë ti qajnë hallet bashkërisht, duke i shprehur pa hezitim të mirat dhe peripecitë me të cilat përballemi në ditët e sotme.

Kryetari i Bashkësisë Islame të Maqedonisë Reis ul Ulema H. Sulejman ef. Rexhepi para se të shpaloste raportin e tij për BIM, propozoi që këtij grupi të prijësve dhe këtyre takimeve në të ardhmen t'u ngjitet një emër. Ai propozoi që ky trup të emërtohet Këshilli Koordinues për Mbrojtjen e Vlerave Islame në Ballkan, si pjesë e Konferencës Islamike Evro - Aziatike, me ç'rast u pranua një zërit nga të gjithë të pranishmit në sallën e konferencës.

Më pas H. Sulejman ef. Rexhepi para të pranishmëve shpalosi problemet dhe nevojat me të cilat përballet BIM, gjatë procesit të decentralizimit dhe ndërtimit të objekteve fetare në vend. H. Sulejman ef. Rexhepi edhe një herë përsëriti nevojën për finalizimin e godinës së Fakulltetit të Shkencave Islame me qëllim që të formohen kushte sa më volitshme për zgjerimin e kapaciteteve të këtij fakulteti dhe rikthimin e tij në një qendër të mirëfilltë prej ku do të dalin kuadrot e reja me perspektivë për të ardhmen.

Efendi Sulejmani gjithashtu propozoi që takimi i ardhshëm të mbahet në shtetin më të ri të Evropës - Republikën e Kosovës, me ç'rast u pranua si propozim nga të gjithë të pranishmit. Më pas fjalën e morën të gjithë prijësit fetarë duke shpaluar një raport të përgjithshëm për problemet me të cilat hasin nëpër vendet e tyre, dhe diskutuan rreth çështjeve që i tangojnë muslimanët në gjitha vendet e Ballkanit.

Pas kësaj konference, të pranishmit u ftuan nga Presidenti i Malit të Zi, z. Filip Vujanoviç i cili kishte shtruar një darkë solemne për nder të Reis ul Ulemave të Ballkanit. Gjatë tërë kohës, mediumet e Malit të Zi, televizionet, radiot dhe gazetat e ndoqën nga afër konferencën dhe darken e shtruar te presidenti, duke i dhënë edhe një herë një jehonë të madhe këtij Këshilli. Mesazhi që u dha nga Mali i Zi, ishte që muslimanët e Ballkanit të vazhdojnë të kultivojnë vlerat dhe të respektojnë njëri tjetrin, pa dallim të fesë dhe kombësisë, ndërsa dallimet të bëhen pjesë e bashkimit me fqinjët, e jo shkak për ndarje me ta.

 

 

Senad  Maku (Makoviq) - Ulqin

 

 

 

 

14.03.2008.islamgjakova.net