Rrahman FERIZI , PRISHTINE

 

"Të pranosh gjithçka që të vjen nga All-llahu dhe të tregosh keqardhje për krijesat e Tij, është nga edukata e Profetëve paqja dhe mëshira e Zotit qoftë mbi ta" (Ebu Sulejman Darani)

Njeriu çdo herë është mes dinamikës aktuale, të kaluarës kontestuese dhe së ardhmes së panjohur.

Nga natyra e tij dualiste (me instinkt dhe intelekt përkundër engjëjve me intelekt e pa instinkt dhe shtazëve me instinkt e pa intelekt), është i prirë për të dy rrugët, të mirën dhe të keçen, humanizmin dhe despotizmin, vulgaritetin dhe dhembshurinë, dashurinë dhe urrejtjen, bamirësin dhe shkatërrimin.

Varësisht se cilat rryma frekuentojnë shpirtin e tij, ato manifestojnë dhe pasqyrojnë veprimet dhe sjelljet në jetën e tij.

Sado që e kupton Njeriu se jeta është një mister i cili nuk kuptohet tërësisht, vetëm se nga valët dhe informacionet Hyjnore të cilat në një masë të madhe i afrojnë distancat mes miopisë së njeriut dhe fenomeneve transcendente, të cilat në mënyrë absolute i rregulloi dhe përsosi Krijuesi Absolut, ai prapë nuk ndalet nga kureshtja e tij lozonjare, pse kjo, pse kështu, sikur kështu, sikur ashtu etj.!

Duke u ndier shpeshherë i vetmuar, frikësuar dhe tronditur, Njeriu nganjëherë arrin edhe të tejkaloj kompetencat e tij, duke u thelluar në tejkuptimin e fenomeneve të Botës, apo edhe duke hezituar në pranimin e realitetit të saj determinues.

Prandaj i gjendur mes përpjekjes së tij meskine dhe determinizmit absolute përpëlitet si peshku në zall, gati sa nuk mbaron " nga vullneti për jetën" dhe pranimin e së vërtetës së sajë, si e atillë që nuk ndryshon edhe nëse ndryshojnë disa nuance të sajë.

Kuptohet se përkundër determinizmit absolut të fatit dhe manifestimit të tij në jetën individuale, globale dhe Universit, nga Njeriu kërkohet njohja, hulumtimi, kuptimi, studimi dhe përsiatja rreth fenomeneve dhe ligjeve të kësaj Bote, dhe asaj të cilës e shohim me "shqisën" e intuitës sonë.

Nuk mjafton vetëm kaq por edhe përpjekja për të ndryshuar (Përcaktimi nuk ndryshon vetëm se përmes duasë-lutjes/Profeti Muhamed paqja dhe mëshira e Zotit qoftë mbi të) përmirësuar dhe prosperuar fatin tonë, individual dhe kolektiv, duke u nisur nga vullneti i mirë brenda suazave të Vullnetit Absolut.

Prandaj thuhet se "Ndryshoje botën ne zemrën tuaj ajo do të ndryshohet në sytë e tu"

"All-llahu nuk e ndryshon gjendjen e një populli pa e ndryshuar ata veten e tyre" (Kur'an).

Drejt ndryshimit pozitiv thërret edhe kuptimi i kësaj porosie e cila në vetë përmban dy elemente esenciale, të cilat do të sjellin lumturinë relative në këtë Botë .

Pra, "Të pranosh gjithçka që të vjen nga All-llahu dhe të tregosh keqardhje për krijesat e Tij, është nga edukata e Profetëve paqja dhe mëshira e Zotit qoftë mbi ta"

Të dy elementet të cilat ndërtojnë këtë fjali të urtë, kanë vend për trajtim dhe analizë, ndoshta për to janë shkruar (dhe mundë të shkruhen) libra, por mendoj se thellimi dhe meditimi ynë në domethëniet e tyre, do të sjellë mesazh të dobishëm brenda nesh, mesazh i cili do të transformojë kuptimin dhe relacionin mes nesh dhe Botës, siç duket aq shumë të bezdisur.
Thonë se Njeriu ka nevojë të përhershme për përtërije te besimit të tij, pse jo edhe raportit të tij me të!

 

 

 

 

26.02.2008.islamgjakova.net