Hamdi Nuhiju

 

Shqiptarët e Maqedonisë kanë favore ose përparësi të shumta. Por, njashtu ato kanë edhe shumë dobësi ose disfavore. Nuk e them që me 7 përfundojnë përparësitë e tyre dhe nuk imponoj mendimin tim në opinionin publik rreth asaj që unë e quaj favor. Kjo që do të shpalos është një pikëpamje e imja qoftë e drejtë ose e gabuar. Lexuesi le ta marrë si të dëshirojë ai. Renditja e tyre do të bëhet nga gjërat esenciale dhe madhore:        

Feja Islame- Përparësia e shqiptarëve të Maqedonisë më e madhja dhe më e rëndësishmja është feja islame. Ky favor është gjithëpërfshirës për shqiptarët në Maqedoni, Kosovë, Shqipëri, Mal të Zi e gjetiu. Historikisht është argumentuar se feja islame ka ruajtur dhe ka kultivuar identitetin kombëtar të shqiptarëve në përgjithësi e në veçanti të shqiptarëve të Maqedonisë. Njohë shumë shqiptar ortodoks të Maqedonisë që nuk dinë as dy fjalë shqipe dhe që ishin kundër pavarësisë së Kosovës. Dua që lexuesi ta ketë parasysh se nuk po sulmoj Ortodoksizmin e as Katolicizmin e shqiptarëve, por dua të shpalos një argument historik që është në të mirën e popullit shqiptar. Atdhetar shqiptar të zelltë dhe punëtor kishim dhe kemi edhe në mesin e ortodoksëve, katolikëve, këtë nuk mund ta mohoj kush, por Islami është ajo forcë e cila i ndejti ballë me shekuj atyre që dëshiruan ta asimilojnë popullin shqiptar.        

Identiteti kombëtar- Shqiptarët janë popull i lashtë i njohur në histori. Shqiptarët e Maqedonisë nuk kanë probleme me identitetin e tyre kombëtar as historikisht e as politikisht. Ato ndjehen si shqiptar që në fakt janë të këtillë dhe këtë të drejtë nuk mund t`ia mohoj asnjë fuqi botërore ose ballkanike. Ndërsa maqedonët kanë probleme esenciale në lidhje me identitetin e tyre kombëtar. Maqedonët si shtet nuk po i njeh Greqia, maqedonishten si gjuhë nuk po e njeh Bullgaria, dhe Maqedonia është e varur direkt prej identiteti politik dhe kombëtar të shqiptarëve të Maqedonisë.          

Pozita gjeografike- Shqiptarët e Maqedonisë jetojnë në tokën më pjellore të këtij vendi. Populli shqiptar graviton që nga Penda e Likovës e deri në liqenin e Ohrit, Strugës, Prespës. Toka pjellorë e Karadakut të Kumanovës, rajoni "oazë" i Pollogut , ana shqiptare përreth lumit Vardar , qendrat atraktive turistike, malet e pasura me drunj të ndryshëm janë mrekulli që na i dhuroi i madhi Zot. Por, jeta dinamike dhe e stërngarkuar me strese të panevojshme i detyroi këto banor të këtyre pasurive hyjnore të marrin rrugën e mërgimit.          

Kosova dhe Shqipëria- Shqiptarët e Maqedonisë kanë fat të madh pse në Ballkan ekzistojnë tashmë dy shtete shqiptare. Këto shtete në histori kanë qenë një siguri e madhe për popullin e këtij vendi, por edhe tash dhe në të ardhmen do të jenë një favor mjaft i madh për zgjidhjen e problemeve të kësaj ane të Shqipërisë. Lidhjet kulturore, tregtare, arsimore me popullin shqiptar të Kosovës dhe Shqipërisë na japin shpresë për një të ardhme më të ndritur të shqiptarëve të Maqedonisë.          

Besnikëria- Në histori jemi të njohur si popull i besës dhe i fjalës. Me të gjitha tendencat teknologjike dhe të modernizmit për të humbur dhe shuar këtë ves të mirë të popullit shqiptar, sot ende gjenë familje, shtëpi dhe shqiptar të Maqedonisë që mbahen fortë pas këtij vesi të mirë dhe të pëlqyeshëm. Shqiptarët e Maqedonisë besnikërinë e tyre e shprehën në golgotën e popullit tonë, por kjo besnikëri mund të gjendet edhe sot në mesin e atyre rretheve të varfra të cilat ndihmohen ndërmjet veti dhe nga kjo Qeveri e Dhunshme janë të distancuar. Të shpresojmë që kjo traditë e mirë të vazhdojë deri në fund të njerëzimit.          

Dashuria ndaj atdheut- Ta duash atdheun tënd është një e mirë e cila rrallë mund të përjetohet në mesin e njerëzve. Nuk është e njëjtë të jesh shqiptar në Tiranë ose në Prishtinë dhe të jesh shqiptar në Kumanovë ose Bitolë. Dashuria e cila është pjesë e emocioneve dhe ndjenjave të miliarda njerëzve në rruzullin tokësor dallon prej urrejtjes dhe shovinizmit. Shqiptarët asnjëherë nuk kanë qenë dhunues, e as që kanë inicuar dhunë dhe luftë ndaj popujve tjerë, por kanë qenë të detyruar që ta mbrojnë me mish e me shpirt atë më esencialen, sepse dashuria ndaj atdheut nuk ka çmim.          

Trimëria- Ky ves mund të duket i çuditshëm për shumicën e lexuesve të këtij shkrimi. Jo pse nuk është i mirë, por pse e lashë në fund të shkrimit! Shqiptarët e Maqedonisë nuk i frikësohen dhunës së Qeverisë, ata nuk frikësohen as në luftë e as në politik. Trimëria është një burim i brendshëm dhe i pashtershëm i këtij populli të kësaj ane. Por, me termin trimëri nuk kuptoj budallakinë, e as mendjemadhësinë, e as dhunën, por me trimëri kuptoj qëndrimin ballë secilës padrejtësi shoqërore.

 

 

 

 

22.02.2008.islamgjakova.net