Rrahman FERIZI

 

-Rrugëtimi i Njerëzve te të cilët dashuria dhe bujaria për të falur është bërë pjesë e zemrave dhe shpirtrave nuk shuhet lehtë, edhe pas stuhive dhe shkretëtirës së pikëllimit dhe mërzisë, shkaktuar nga baticat dhe zbaticat e jetës.

Në çdo Njeri është e mbjellë pema e dashurisë, respektit të ndërsjellë dhe dinjitetit hyjnorë, ndodhë që brenda fryteve të kësaj peme të mbijnë ndonjëherë thera të cilat "verbojnë" hijeshinë dhe helmojnë shijen e sajë.

Por njerëzit e mençur ua këpusin degët e tilla pemëve të dashurisë në zemrat e tyre, duke mos iu lënë rritë për të iu bërë hije; faljes dhe mëshirës, duke ujitur durimin dhe zemërgjerësinë përballë urrejtjes dhe zilisë.

Mbi çdo dashuri ideale, sado solide të jetë ajo qëndron një dozë e maturisë dhe kujdesit, për ruajtjen e sajë në tehun e jetës.

Dashuria dhe ndjenja që shëmbëllen në zemrat e lidhura për hir të Dashurisë ndaj Krijuesit Absolut, dhe sakrificës sublime ndaj Tij, nuk shuhen lehtë nga qiriu i jetësimit të tyre, edhe atëherë kur mbretëron ftohtësire, furtunë dhe errësirë e plotë në tërë Botën.

Njerëzit e devotshëm rrezatojnë nga zemrat e tyre shkëndija të dashurisë dhe pushojnë në sytë e tyre shqimet bilur, përkundër njerëzve mëkatar të cilët janë përfshirë nga mjegullat e vranësisë, fytyrë vrenjtur dhe urrejnë madje edhe veten e tyre, janë të urrejtur nga njerëzit dhe të gatshëm njerëzve t'ua marrin dashurinë dhe mos t'ua kthejnë me dashuri por me urrejtje.

Sot në botën e materializmit, dinamikës kaotike dhe modernitetit oportunist, më shumë se kurrë zemrat kanë nevojë për pranverë të dashurisë subtile, dëlireshme, të pastër, e cila për hir të idealit hyjnor sfidon edhe veten për të trajtuar njeriun me humanizëm.

Maturia dhe balancimi mes respektit dhe sinqeritetit është kalaja me e fortë e ruajtjes se dashurisë.

Në dashurinë mes njerëzve nuk favorizohet egoizmi dhe interesi personal para atij kolektiv, dhe nuk bashkohet njëanshmëria me solidaritetin.
Kurdoherë që në raportet ndër njerëzore gërshetohen komponentit e syefaqësisë dhe lavdërimit të rrejshëm, duke mos pranuar qortimet si mësim dhe elemente të kultivimit të filizave të dashurisë, do të lindin hibrid të cilët do të hibridizojnë pemën e dashurisë.


Një ndër elementet e vazhdimësisë së dashurisë ndër njerëzore është edhe pranimi i natyrës së njeriut, si krijesë naive, gabimtare dhe variabile.

Në rrugën e dashurisë ka hendeqe dhe tatëpjetës të cilat po nuk u kaluan me durim, mund të ngelet në stadin e parë të rrugës.

Ato pengesa mund të kalohen me konsultime, sqarime dhe kuptim të natyrave dhe nuancave të personalitetit shumëdimensional njerëzor, duke u larguar mjegullat e paragjykimeve do të ndriçohet më mirë dielli i pranverës së dashurisë në jetë.

Vend për dashuri të çiltër ka vetëm në zemrat të cilat janë male vigane të virtyteve, rrugë të gjata të durimit dhe stinë të sfidave të jetës, ato zemra nuk i "ngarkon" mllefi spontan, nuk i shpenzon "ofendimi" apo qortimi momental dhe nuk i ndërron busulla e interesave afatshkurtra.


Në një kuptim të porosisë profetike thuhet: " Mirësinë e Njeriut kurrë mos e harro, ndërsa nëse të ka bërë keq harro menjëherë, mirësinë e bërë ndaj dikujt harro menjëherë ndërsa keq bërjen ndaj tij kurrë mos e harro"

Ky mesazh profetik jep konotacione të orientimit të digave të dashurisë në jetën komplekse ndër njerëzore, dhe ofron model të tejkalimit të barrierave të hipokrizisë.

Dashurisë mes njerëzve i ka dhënë vend të veçante Krijuesi Absolut, duke aluduar në gjenezën e përbashkët mes të gjithë njerëzve, shumë versët Kur'anore citojnë formulën universale të ngjashmërisë njerëzore duke thirrur " O Bijtë e Ademit, O ju njerëz", për tu privilegjuar ata që kanë hyrë nën hijet e pemës Hyjnore të dashurisë " O ju që keni besuar ".

Ndërsa i dërguari i fundit i Zotit Muhamedi paqja dhe mëshira e Zotit qoftë mbi të e kushtëzon besimin me dashurinë reciproke;

" Nuk do të hyjë askush në parajsë përderisa nuk ka besuar (bindshëm) dhe nuk e keni plotësuar besimin derisa nuk duheni mes veti, a të ju tregoj se si të arrini të duheni mes veti?

Përhapeni paqen (selamin ) mes jush "

Pra besimi i ngritur mbi bedenat e zemrave me selam krijon klimë të mirëbesimit dhe dashurisë në këtë botë dhe shpëtim në botën tjetër, ndërsa dashuria është diell i pranverës së jetës dhe kusht për lumturinë njerëzore.

 

 

 

 

13.04.2008.islamgjakova.net