Secila kaptinë e Kur'anit i ka protagonistët kryesorë, temën bosht, ndjenjat dominante, zërin specifik dhe mesazhin relevant. Duke udhëtuar nëpër 114 kaptina të këtij libri, njeriu kalon nëpër 114 pallate të një kompleksi mahnitës në të cilin gjendet thesar i paçmuar në formë ushqimi intelektual, ngushëllim emocional, burim motivimi etj.

Kaptina e Keutherit edhe pse e shkurtër, është një balsam (ilaç) për shpirtrat e tronditur dhe humbjet në vend dhe në kohën e ekzistimit të tyre.

Është e pamundur që një musliman apo muslimane nuk e di këtë kaptinë më të shkurtër të Kur'anit përmendësh, dhe ky fakt lehtëson përcjelljen e analizës. Pyetja që shtrohet para nesh është përse Krijuesi i Madhërishëm ia shpallë këtë informatë Muhammedit a.s. dhe në çfarë mënyre kjo është e rëndësishme për ne?

Shkaku i shpalljes së kësaj kaptine ishte vdekja e bijve të Muhammedit a.s. e cila nuk e kishte lënë tërësisht indiferent. Këtë ngjarje e shfrytëzuan armiqtë e Muahmmedit a.s. duke i vendosur në plagët e freskëta deklarata për ta mohuar fenë islame.

Thënë gjuhë moderne- drejtonin ndaj Muhammedit a.s. dhe besimtarëve luftë të vërtetë psikologjike me qëllim demotivizimi, dobësim të fesë, fuqisë morale dhe mbjelljen e dyshimit në mëshirën e Krijuesit.

Në kontekstin e përshkruar të zbritjes së verseteve të cituar, qartë Allahu i Madhërishëm kurajon Muhammedin a.s. duke iu drejtuar me një ton ngushëllues: "Ne, vërtet të dhamë ty shumë të mira. Andaj ti falu dhe prej kurban për hir të Zotit tënd! E s'ka dyshim se urrejtësi yt është farësosur." (El - Keuther, 1-3)

Sipas hadithit, Keuther është lum në xhennet nga i cili do të pinë besimtarët. Por, kjo kaptinë i adresohet edhe secilit pasues të sinqertë të islamit, i cili kalon nëpër vuajtje për shkak të një humbje të caktuar në jetë (vdekja e fëmiut, mikut të afërt, sëmundja, etj) duke ia kompensuar humbjen e tij momentale me shpërblim të përhershëm. "Andaj ti falu dhe prej kurban për hir të Zotit tënd."

Krijuesi i Gjithëdijshëm u këshillon robërve të Tij që pa marrë parasysh sprovat që i godasin mos harrojnë namazin dhe sakrificën për të ndihmuar që ta ruajnë fokusin e tyre në këtë jetë turbulente.

Kaptina Keuther, në mes tjerash ofron kahjet e programit aplikativ praktik të elementeve të motivimit, si në planin individual ashtu edhe kolektiv.

Të gjitha kombet e suksesshme posedojnë sisteme të detajizuara të motivimit në nivel kombëtar, sepse nga kjo varet produktiviteti i punës dhe prosperiteti i përgjithshëm i një populli.

"E s'ka dyshim se urrejtësi yt është farësosur." 'Ebter' ka kuptim të gjerë dhe është vështirë të përkthehet në mënyrë precize në gjuhën shqipe. Ebter paraqet personin e privuar nga çdo e mirë, pa asnjë gjë pozitive, pa trashëgimtar.

Pra, Allahu i Madhërishëm këshillon Muhammedin a.s. dhe muslimanët e tjerë të cilët janë të ekspozuar urrejtjes, karikaturave dhe formave tjera të luftës psikologjike, që ata që mbjellin urrejtje, përbuzje, nënçmim nuk do të kenë sukses dhe do jenë të harruar dhe me trashëgimtar të shuar.

Me fjalë tjera: besimtar, pa marrë parasysh sprovat tuaja dhe humbjet e rënda, Zoti juaj do t'iu kompensoj në ahiret, por ju mos e harroni namazin se ai është shtyllë e stabilitetit tuaj, burimi i fuqisë suaj dhe stabilitetit mendor. Mos e harroni as qëllimin e krijimit tuaj e ky është sakrifica dhe përpjekja e pareshtur në rrugën e të Vërtetës. Pa dyshim se në këtë rrugë do të keni armiq të shumtë dhe pengesa të mëdha. Por, qëndroni imun në shigjetat helmuese të tyre.

Duke analizuar këtë kaptinë, lehtë mund të identifikohen situatat e ngjashme të jetës që përsëriten ne çdo vend dhe kohë, kështu që duket se kjo kaptinë ka zbritur këtë mëngjes edhe pse është e vjetër një milenium e gjysëm. Me plotë të drejtë kjo kaptinë mund të quhet kod i mileniumit. Andaj, mesazhi i kësaj kaptine është:

- Luftërat psikologjike janë realitet në secilën kohë dhe vend;

- Ngushëllimi ju nevojitet edhe më të fuqishmëve;

- Praktikimi i domosdoshëm i faktorëve të motivimit në të gjitha nivelet;

- Fokusimi i drejtë esencial në momentet e krizave;

- Nevoja e përditshme e mbushjes në burim;

- Çdo mbjellje e së keqes i kthehet shkaktarit;

- Armiqësia e hapur është shpesh fakt i fuqizimit të cakut;

- Fuqia shpirtërore e njeriut qëndron në baraspeshën e tij mendore.

 

 

 

Dr. Ali F.Iljazi

 

22.12.2007.islamgjakova.net