Koncepti islam i suksesit dhe kriteri i tij për të gjykuar se kush llogaritet i suksesshëm janë gjëra të dallueshme nga fetë apo ideologjitë tjera. Njeri i suksesshëm sipas standardeve të rëndomta llogaritet një që është i pasur, i fuqishëm, që ka shumë njerëz nën komandën e tij, që ka më shumë kapital tokësor në pronësinë e tij, që jeton në shtëpi të mirë e të madhe, që vozitet me veturë të klasit të lartë, që ka shumë djem, që i përket ndonjë fisi të madh e kështu me radhë. Mirëpo, Islami nuk thotë se këta persona duhet të konsiderohen si të suksesshëm. Sipas tij, pra, i atillë është një njeri që i beson Zotit, që i beson Muhammedit alejhi selam dhe të dërguarve të tjerë, që i beson Kur'anit dhe librave të tjerë, që i beson Ditës së Gjykimit dhe botës së amshueshme, që në zemrën e vet e rrënjos se vetëm All-llahu i Lartësuar duhet të adhurohet, që jep në rrugë të All-llahut, që i praktikon të gjitha ritet dhe veprat e porositura të islamit, që i frikohet All-llahut dhe i shmanget së keqes, që është i devotshëm dhe bën punë fisnike, që ruhet nga gjërat e ndaluara, që i plotëson të gjitha obligimet ndaj Krijuesit dhe krijesave, që urdhëron për të mirë dhe ndalon nga e keqja dhe mbi të gjitha këto, udhëheq një jetë në pajtim me të gjitha parimet e Islamit dhe rrjedhimisht përfiton jetë të mirë edhe në botën tjetër.

Argumente nga Kur'ani

1) "Të cilët e besojnë të fshehtën, e kryejnë faljen (namazin) dhe prej asaj që Ne u kemi dhënë, ata japin (zeqat, sadaka etj.). Dhe ata, të cilët besojnë në atë që t'u shpall ty, dhe në atë që është shpallur para teje, e që janë të bindur plotësisht për botën tjetër. Të tillët janë të udhëzuar nga Zoti i tyre dhe vetëm ata janë të shpëtuarit!" (Kur'an, 2: 3-5).

2) "Nga ju le të jetë grup që thërret në atë që është e dobishme, urdhëron për punë të mbara dhe ndalon nga e keqja! Të tillët janë ata të shpëtuarit!" (Kur'an, 3: 104).

3) "O ju të cilët besuat, mos e hani kamatën që po e shumëfishoni dhe kini frikë (dënimin e) All-llahut ashtu që të gjeni shpëtim!" (Kur'an, 3: 130).

4) "O ju besimtarë, bëni durim, bëhuni të qëndrueshëm kundër armikut, rrini të përgatitur dhe, që të shpëtoni, ruajuni dënimit të All-llahut!" (Kur'an, 3: 200).

5) "O ju që besuat! Kini frikë All-llahun dhe kërkoni afrim tek Ai, luftoni në rrugën e Tij që të gjeni shpëtim!" (Kur'an, 5: 35).

6) "Atë ditë peshimi (masa) është i drejtë. Atij që i rëndohen peshojat, ata janë të shpëtuar!" (Kur'an, 7: 8).

7) "Që e pranojnë të dërguarin (Muhammedin), Pejgamberin arab, (që nuk shkruan as nuk lexon), të cilin e gjejnë të cilësuar (të përshkruar me virtytet e tij), te ata në Tevrat dhe në Inxhil, e që i urdhëron ata për çdo të mirë dhe i ndalon nga çdo e keqe, u lejon ushqimet e këndshme dhe u ndalon ato të pakëndshmet, heq nga ata barrën e rëndë të tyre dhe prangat që ishin mbi ta. Pra, ata të cilët e besojnë atë, e nderojnë dhe e ndihmojnë, veprojnë me dritën që iu zbrit me të, të tillët janë të shpëtuarit!" (Kur'an, 7: 157).

8) "O ju që besuat, falne namazin me ruku e sexhde dhe vetëm Zotin tuaj adhurojeni! Bëni punë të mira (të dobishme), se do të gjeni shpëtim!" (Kur'an, 22: 77).

9) "Kur thirren besimtarët për gjykim ndërmjet tyre te All-llahu dhe te i dërguari i Tij, e vetmja fjalë e tyre është të thonë: "Dëgjuam dhe respektuam!" Të tillët janë ata të shpëtuarit!" (Kur'an, 24: 51).

10) "E për sa i përket atij që është penduar, që ka besuar dhe ka bërë vepra të mira, ai le të shpresojë se është nga të shpëtuarit!" (Kur'an, 28: 67).

11) "Andaj, jepja të afërmit atë që i takon, e edhe të varfrit edhe udhëtarit, e kjo është shumë më e dobishme për ata që veprojnë për hir të All-llahut dhe të tillët janë ata të shpëtuarit!" (Kur'an, 30: 38).

12) "Të cilët rregullisht e falin namazin dhe e japin zeqatin dhe ata, e mu ata janë të plotbindur për botën tjetër. Të tillët janë të udhëzuar në një rrugë të qartë prej Zotit të vet dhe ata janë fatlumë!" (Kur'an, 31: 4-5).13) "Andaj, sa të keni mundësi ruajuni prej dënimit të All-llahut, dëgjoni, respektoni dhe jepni për të mirën tuaj, e kush i ruhet lakmisë së vetvetes, të tillët janë të shpëtuarit!" (Kur'an, 64: 16).

 

 

përktheu nga anglishtja: Arsim JONUZI 03.01.2008

shkëputur nga libri: Kodi Social dhe Moral në Islam

autor: Muhammed el-Kudri

 

 

04.01.2008.islamgjakova.net