Ithtarët e Islamit janë të obliguar që të urdhërojnë për të mirë dhe të ndalojnë nga e keqja. Kjo është nga shkaku se ata janë ummeti i fundit dhe se i dërguari i tyre është i fundit, pasi nuk do të ketë më asnjë pejgamber pas Muhammedit alejhi selam, kështuqë misionin që e kishin të gjithë të dërguarit, pra, për të urdhëruar në të mira e për të ndaluar nga të këqijat, do ta përmbushin pasuesit e Pejgamberit të fundit, pra, Muhammedit alejhi selam. Në bazë të Kur'anit Famëmadh, muslimanët janë bashkësia më e mirë e njerëzve të cilën i Madhëruari e ka ngritur mbi tërë njerëzimin dhe detyra e tyre është që t'i urdhërojnë njerëzit për të pasur sjellje të mirë dhe t'i ndalojnë ata nga të bërit keq dhe krime.

 

Argumente nga Kur'ani

1) "Nga ju le të jetë grup që thërret në atë që është e dobishme, urdhëron për punë të mbara dhe ndalon nga e keqja! Të tillët janë ata të shpëtuarit" (Kur'an, 3: 104).

2) "Ju jeni populli më i dobishëm i ardhur për të mirën e njerëzve! Të urdhëroni për mirë, të ndaloni nga veprat e këqija dhe të besoni në All-llahun! E sikur ithtarët e librit të besonin drejt, do të ishte shumë më e mirë për ta! Disa prej tyre janë besimtarë, po shumica e tyre janë larg rrugës së Zotit!" (Kur'an, 3: 110).

3) "Besimtarët dhe besimtaret janë të dashur për njëri-tjetrin, urdhërojnë për të mirë, e ndalojnë nga e keqja, e falin namazin dhe japin e zeqatin, e rrespektojnë All-llahun dhe të dërguarin e Tij. Të tillët do t'i mëshirojë All-llahu! All-llahu është ngadhënjyes, i urtë" (Kur'an, 9: 71).

4) "(Të xhennetit janë) Edhe ata që pendohen, ata që sinqerisht e adhurojnë All-llahun, ata që falënderojnë, ata që agjërojnë, ata që bëjnë ruku, ata që bëjnë sexhde, ata që urdhërojnë për të mira e ndalojnë nga të këqijat dhe që i përmbushin dispozitat e All-llahut. Pra, përgëzoi besimtarët!" (Kur'an, 9: 112).

5) "(Ai ndihmon) Ata të cilët kur Ne ua mundësojmë vendosjen në tokë, ata e falin namazin, e japin zeqatin, urdhërojnë për punë të miaë dhe ndalojnë nga e keqja. All-llahut i takon përfundimi i çështjeve" (Kur'an, 22: 41).

 

Argumente nga Hadithi

1. Hudhejfe (All-llahu qoftë i kënaqur prej tij!) rrëfen se Pejgamberi alejhi selam ka thënë: "Pasha Atë në Dorën e të Cilit është shpirti im, patjetër e keni të urdhëroni për punë të mira dhe të ndaloni nga të këqijat, sepse përndryshe All-llahu nuk do t'jua pranojë lutjet, madje edhe nëse i luteni!". [Transmeton Tirmidhiu]

2. El-Urs ibën Amira (All-llahu qoftë i kënaqur prej tij!) rrëfen se Pejgamberi alejhi selam ka thënë: "Në rast se ndonjëri prej jush nuk e miraton ndonjë mëkat që bëhet në tokë megjithëse e sheh atë duke ndodhur, atëherë për të është njëjtë sikurse të mos kishte qenë prezent, mirëpo nëse dikush e miraton mëkatin, ai do të konsiderohet sikur të kishte qenë prezent në atë vend, megjithëse ndoshta nuk ka qenë vërtetësisht aty!". [Transmeton ebu Davudi]

3. Ebu Bekri (All-llahu qoftë i kënaqur prej tij!) ka thënë: "Ju e lexoni ajetin: "O ju që besuat, ruajeni veten tuaj! Ai që ka humbur, nuk ju dëmton juve kur jeni në rrugë të drejtë! Kthimi i të gjithë juve është te All-llahu dhe Ai ju njofton për atë që vepruat!" (Kur'an, 5: 105), dhe më pas vazhdoi: "E kam dëgjuar Pejgamberin alejhi selam të thotë: "Kur njerëzit shohin diç të pakëndshme dhe nuk e ndërrojnë atë, së shpejti dënimi i All-llahut do t'i përfshijë të gjithë ata!". [Transmeton ibën Maxhe dhe Tirmidhiu]

4. Xherir ibën Abdullahu (All-llahu qoftë i kënaqur prej tij!) rrëfen se Pejgamberi alejhi selam ka thënë: "Nëse një njeri është që bën punë të pahijshme (të mosbindjes) dhe i cili gjendet në një mes ku të tjerët mund ta ndalojnë atë për të mos vepruar keq dhe nuk e ndalojnë, atëherë All-llahu do t'i qëllojë këta me dënim përpara se të vdesin!". [Transmeton ebu Davudi dhe ibën Maxhe]

5. Ibën Adi el-Kindi (All-llahu e mëshiroftë!) tha: "Një myshteri yni thotë se e ka dëgjuar gjyshin tim duke thënë se Pejgamberi alejhi selam ka thënë: "All-llahu i Lartësuar nuk i dënon njerëzit e thjeshtë për atë se çfarë bëjnë njerëzit e klasave të larta deri në atë moment që ata (njerëzit e thjeshtë) me sytë e tyre të shohin se publikisht bëhen gjëra të pahijshme dhe megjithëse janë në gjendje t'i ndalojnë, ata nuk e bëjnë këtë, e atëherë dënimi i Tij do të bie edhe mbi njerëzit e thjeshtë, edhe mbi njerëzit e klasave të larta!". [Transmetohet në Sharhus-Sunneh]

6. Abdullah ibën Mes'udi (All-llahu qoftë i kënaqur prej tij!) rrëfen se Pejgamberi alejhi selam ka thënë: "Kur bijtë e Israilit filluan të veprojnë punë të mosbindjes, njerëzit e mençur nga mesi i tyre i parandaluan, por ata nuk u shmangën. Më pas, ata (të mençurit) filluan të qëndrojnë bashkë me ta, pra, hanin e pinin sëbashku dhe filluan t'iu përzihen zemrat me zemrat e tyre, e si rrjedhojë u mallkuan nga gjuha e Davudit dhe Isait - birit të Merjemes (Paqja e All-llahut qoftë mbi të gjithë ta!). Kjo ndodhi ashtu ngase ata nuk u treguan të nënshtruar dhe filluan të marrin traditë të mëkatimit!". Pastaj, Pejgamberi alejhi selam i cili ishte duke qëndruar ulur, u zgjua dhe tha: "Jo, pasha Atë në Dorën e të Cilit është shpirti im! Jo, përderisa të bashkoheni me punëmirët!".
[Transmeton Tirmidhiu dhe ebu Davudi]

7. Enesi (All-llahu qoftë i kënaqur prej tij!) rrëfen se Pejgamberi alejhi selam ka thënë: "Natën që u ngrita lart në qiej pashë disa njerëz që iu preheshin buzët me gërshërë të zjarrta e unë e pyeta Xhibrilin se kush janë këta dhe pse po dënohen kështu e ai më tha: "Këta janë njerëz të ummetit tënd që i urdhërorin njerëzit për të bërë mirë, ndërsa vetë nuk vepronin ashtu!". [Transmetohet në Sharhus-Sunneh dhe nga Bejhekiu]

8. Ebu Sa'id el-Kudri (All-llahu qoftë i kënaqur prej tij!) rrëfen se Pejgamberi alejhi selam ka thënë: "Nëse ndonjëri prej jush sheh ndonjë gjë të pakëndshme, le ta ndërrojë me duart e tij, por në pamundësi, le ta ndërrojë me gojën e tij, e nëse as kështu nuk mundet, atëherë le ta urrejë me zemër, porse ky është besim i dobët!". [Transmeton Muslimi]

9. Xhabiri (All-llahu qoftë i kënaqur prej tij!) transmeton se Pejgamberi alejhi selam ka thënë: "All-llahu i Lartësuar e urdhëroi Xhibrilin alejhi selam që ta shkatërrojë një qytet me gjithë banorët e tij dhe kur Xhibrili shkoi për ta kryer detyrën, pa se ishte një njeri që kishte bindje të madhe ndaj All-llahut, kurse Ai i tha që të shkojë e ta fillojë shkatërrimin së pari nga ai që e kishte përmendur Xhibrili!".

10. Ebu Sa'id el-Kudri (All-llau qoftë i kënaqur prej tij!) rrëfen se Pejgamberi alejhi selam ka thënë: "Xhihadi më i shkëlqyeshëm është kur ndonjëri prej jush e flet të vërtetën përpara një sunduesi tiran!". [Transmeton ebu Davudi dhe Tirmidhiu]

 

Përktheu nga anglishtja: Arsim JONUZI 29.12.2007

Shkëputur nga libri: Kodi Social dhe Moral në Islam
Autor: Muhammed el-Kudri

 

 

30.12.2007.islamgjakova.net