Në një rrëfim që përcjell shejh Ali et-Tantavi, ai tregon:
Isha kadi në Siri. Një natë, një grup prej nesh vendosëm të kalonim natën te një mik yni. Mirëpo, gjatë mbrëmjes, ndjeva një shtrëngim në gjoks dhe e kisha të vështirë të merrja frymë.
U kërkova miqve të mi të më lejonin të largohesha, por ata këmbëngulën që të qëndroja me ta. Meqë nuk po ndihesha mirë, u thashë se do të dilja pak për të ecur dhe për të marrë ajër të pastër.
Dola në errësirën e natës dhe nisa të ecja.
Teksa po kaloja pranë një kodrine, dëgjova zërin e një gruaje që qante dhe lutej me gjithë shpirt.
U afrova dhe pashë një grua të mbytur në dëshpërim. Ajo qante me dënesë dhe i lutej me sinqeritet Allahut të Madhëruar.
E pyeta:
- Motër, çfarë të ka ndodhur që po qan kështu?
Ajo m'u përgjigj:
- Burri im është një njeri i ashpër dhe i padrejtë. Më ka dëbuar nga shtëpia, më ka marrë fëmijët dhe është betuar se nuk do të më lejojë t'i shoh më kurrë. Nuk kam askënd ku të drejtohem dhe nuk kam ku të shkoj.
E pyeta:
- Pse nuk e paraqet çështjen tënde te kadiu?
Ajo nisi të qante edhe më fort dhe tha:
- Si mund të arrijë një grua si unë deri te kadiu?
Atëherë, shejh Ali et-Tantavi e përfundoi rrëfimin e tij me lot në sy:
"Ajo nuk e dinte se Allahu tashmë e kishte sjellë kadiun deri tek ajo, në mes të errësirës së natës, që ai vetë ta pyeste për hallin e saj."

SubhanAllah!

Kush e bëri të dilte në errësirën e natës? Kush e drejtoi pikërisht në atë vend, që të ndalonte përpara saj dhe, si kadi, ta pyeste për hallin dhe nevojat e saj?
Çfarë duaje kishte bërë ajo grua e thjeshtë dhe e varfër, që përgjigjja ndaj lutjes së saj të vinte kaq shpejt dhe në një mënyrë kaq të jashtëzakonshme?
Ju të gjithë që po përjetoni dhimbje e vështirësi, ju që mendoni se bota është kthyer kundër jush, ngrijini duart drejt qiellit dhe mos thoni: "Si do t'i zgjidh problemet e mia?" Përkundrazi, përuluni para Atij që i di të gjitha dhe që ka fuqi t'i zgjidhë ato.
Jini të sigurt se pas durimit tuaj ju pret diçka e bukur.
Vërtet, Allahu i Madhëruar nuk ju sprovon pa një urtësi dhe pa një të mirë që mund të jetë e fshehur në atë sprovë, edhe atëherë kur ju mendoni të kundërtën.