Sot, në ambientet e Medresesë së Mesme “Alauddin” në Prishtinë, me pjesëmarrjen e Myftiut të Kosovës, Naim ef. Tërnava, bashkëpunëtorëve të tij, profesorëve te Medresesë dhe të Fakultetit të Studimeve Islame, si dhe me pjesëmarrjen e atasheut të Çështjeve Fetare të Arabisë Saudite, z. Amer Alanazi dhe të konsulit të Arabisë Saudite, Sultan es Sehli, u inaugurua programi për shpërndarjen e iftareve dhe hurmave i Mbretërisë së Arabisë Saudite.

Në fjalën e tij drejtuar të pranishmëve, Myftiu Naim ef. Tërnava, falënderoi Mbretërinë e Arabisë Saudite për ndihmat e vazhdueshme që kanë dhënë për Kosovën dhe për Bashkësinë Islame të Kosovës. Ai tha se ne si institucion mbesim të përkushtuar që të vazhdojmë edhe më tej bashkëpunimin e mirë që kemi me Mbretërinë e Arabisë Saudite.

Nga ana e tij, atasheu Alanazi, tha se ndihemi shumë të lumtur që sot jemi në Kosovë për të filluar me vëllezërit tanë kosovarë programin për shpërndarjen e iftareve dhe të hurmave. “Shfrytëzoj rastin që t’u uroj gjithë besimtarëve myslimanë fillimin e muajit Ramazan, duke lutur Zotin që t’ua pranojë punët dhe veprat e mira që i bëjnë përgjatë këtij muaji” – tha ndër të tjera z. Alanazi.

Në fund të programit, për të pranishmit u shtrua edhe iftari i parë i këtij projekti.

Vlen të përmendet se ky projekt për shpërndarjen e iftareve dhe hurmave këtë vit po realizohet në më shumë se 102 shtete të botës.