Me rastin e shënimit të përvjetorit të lindjes së Pejgamberit Muhamed a.s., një grup të rinjsh myslimanë në Nigeri zgjodhi ta shënojë këtë ditë me një nismë humanitare.
Sipas Ministrisë së Informacionit të Cross River, anëtarë të Bogobiri Muslim Youth vizituan 30 pacientë në Spitalin e Përgjithshëm të Calabarit, duke u ofruar ndihmë financiare për pagesën e trajtimit mjekësor dhe blerjen e barnave. Të rinjtë gjithashtu u lutën për shërimin e pacientëve.
Sekretari i përgjithshëm i grupit, Hassan Aliyu, tha se zgjedhja e spitalit ishte e qëllimshme, me synimin për të mbështetur njerëzit në nevojë, veçanërisht ata që nuk kanë mundësi të përballojnë shpenzimet e trajtimit.
Koordinatori i grupit, Shaaban Abdullahi Yarima, tha se nisma ishte një mënyrë për të shprehur dashurinë, solidaritetin dhe kujdesin ndaj njerëzve në nevojë, në frymën e mësimeve të Pejgamberit Muhamed a.s.
Drejtori mjekësor i spitalit, Dr. Kenneth Takim, falënderoi të rinjtë për ndihmën dhe e cilësoi nismën si një shembull të humanizmit në veprim. Sipas tij, ndihma u ofrua pa dallim feje dhe pacientëve u dha jo vetëm mbështetje financiare, por edhe shpresë në një moment të vështirë.
Pacientët përfitues falënderuan grupin dhe shprehën shpresën se nisma të tilla do të frymëzojnë edhe individë e organizata të tjera për të ndihmuar njerëzit në nevojë.
Për të rinjtë e Bogobirit, shënimi i përvjetorit të lindjes së Pejgamberit Muhamed a.s. u shndërrua në një akt solidariteti dhe bamirësie, përmes kujdesit ndaj të sëmurëve dhe ndihmës për njerëzit në nevojë.