Dr. Ahmed El-Gendy, profesor i asociuar i fizikës në Universitetin e Teksasit në El Paso (UTEP), është nderuar me çmimin prestigjioz "2026 Marie Curie Medal Award in Cancer Nanomedicine", për kërkimet e tij mbi përdorimin e nanoteknologjisë në zhvillimin e qasjeve të reja për trajtimin e kancerit.
Çmimi i është dhënë nga International Association of Advanced Materials (IAAM), me seli në Suedi, në vlerësim të punës së tij shkencore në fushën e nanomjekësisë dhe materialeve të avancuara.
Puna e tij shkencore fokusohet te nanopjesëzat magnetike, të cilat mund të gjenerojnë nxehtësi të kontrolluar. Kjo teknikë, e njohur si hipertermia magnetike, po studiohet si një mënyrë e mundshme për të dëmtuar qelizat kancerogjene dhe për të zhvilluar në të ardhmen trajtime më të targetuara.
Në korrik, UTEP publikoi një artikull mbi kërkimet e tij, duke theksuar përpjekjet e ekipit për të zhvilluar nanopjesëza më efikase për përdorime të ardhshme në terapinë kundër kancerit.
Në një intervistë për Al Jazeera, El-Gendy foli për rëndësinë e këtij vlerësimi dhe për punën shumëvjeçare të ekipit të tij në kërkimin e teknologjive të reja për trajtimin e tumoreve.
I lindur dhe i formuar akademikisht në Egjipt, El-Gendy ka kryer studimet universitare dhe masterin në Alexandria University, përpara se të vazhdonte karrierën kërkimore në Shtetet e Bashkuara.
Ky nuk është çmimi i parë ndërkombëtar për të. Në vitin 2024, ai u nderua gjithashtu me IAAM Advanced Materials Award për punën e tij në fushën e materialeve të avancuara.