Një prift katolik amerikan ka njoftuar se është konvertuar në Islam, duke e përshkruar vendimin e tij si "kthim në shtëpi".
Përkatësisht, prifti Hilarion Heagy në faqen e tij në Facebook ka njoftuar të shtunën më 25 shkurt lajmin për konvertimin e tij në Islam, duke e ndryshuar emrin në Seid Abdul-Latif.
Hilarion Heagy ishte ortodoks rus dhe u angazhua si prift në Kaliforni, pasi iu bashkua Kishës Ortodokse Antiokase në vitin 2003, dhe më pas, në vitin 2017, u konvertua në katolicizëm dhe iu bashkua të ashtuquajtës Kisha Katolike Lindore.
Hilarion Heagy shkroi në faqen e tij në Facebook: “Pas dekadash që jam tërhequr nga Islami në shkallë të ndryshme, më në fund kam vendosur të bëhem musliman. Nuk kisha zgjidhje, sepse: “Atë që Allahu e udhëzon në rrugën e drejtë – askush nuk mund ta humbë, e atë që Ai e lë në humbje – askush nuk mund ta udhëzojë në rrugën e drejtë. Dhe me të vërtetë është si "të kthehesh në shtëpi". Ky është besimi im parësor. Sepse Kurani thotë se ne e adhuruam dhe iu bindëm vetëm Allahut edhe para se të lindnim”, tha ai, duke iu referuar ajeteve kuranore.