Me rastin e Ditës së Flamurit dhe Ditës së Pavarësisë së Shqipërisë, SHML "Medreseja Alauddin" organizoi një program festiv dhe solemn, në të cilin morën pjesë nxënës, mësimdhënës dhe mysafirë të nderuar.
Programi u hap me lexim të Kuranit nga nxënësi Amar Ahmeti, pasuar nga intonimi i Himnit të Shqipërisë dhe Himnit të Kosovës.
Në fjalën hyrëse u theksua rëndësia historike e 28 Nëntorit, si simbol i unitetit, sakrificës dhe qëndresës së popullit shqiptar.
Drejtori i Medresesë Alauddin, prof. Fadil ef. Hasani, në adresimin e tij theksoi se aktivitete të tilla na nxisin të rrisim dashurinë dhe përkushtimin ndaj vendit tonë. Ai uroi nxënësit, stafin dhe mysafirët për Festën e Flamurit
Ndërsa sekretari i përgjithshëm i BIK-ut, z. Ahmet Sadriu, i pranishëm në këtë ceremoni, vlerësoi rolin e rëndësishëm të Medresesë në historinë kombëtare dhe veçanërisht në periudhën e çlirimit të Kosovës.
Programi u pasurua me pjesë të ndryshme artistike të përgatitura nga nxënësit, përfshirë:
• interpretimet e korit të djemve dhe korit të vajzave;
• fragmente poetike kushtuar atdheut;
• interpretimin emocionues të nxënësit Rijad Demiri me poemën "Një piskamë tokën ka lëkundur";
• shkrimin eseistik të nxënëses Ermira Mehani për nder të 28 Nëntorit;
• disa sekuenca përmes sllajdeve të përgatitura nga nxënësi Anik Banjska.
Në përmbyllje të manifestimit u shprehën falënderime të veçanta për drejtuesit e shkollës dhe stafin mësimdhënës për mbështetjen dhe përkushtimin e vazhdueshëm, si dhe për të gjithë nxënësit që kontribuuan me talentin dhe angazhimin e tyre në realizimin e këtij programi festiv.
SHML Medreseja "Alaudin" uron të gjithë shqiptarët për festën e 28 Nëntorit, duke dëshiruar paqe, mirëqenie dhe unitet për kombin tonë.

Përgatiti: Ajna Haxhiu

&t=2s