Falë bashkëpunimit me Komunën dhe kontributit të bamirësve, sot dy familje që më parë jetonin në kushte të vështira kanë një strehë të sigurt.

Në këtë ditë të rëndësishme për popullin tonë, Shoqata "Bereqeti", në kuadër të Këshillit të Bashkësisë Islame të Gjakovës në bashkëpunim me Komunën e Gjakovës, ka përuruar dhe dorëzuar çelësat e shtëpive të reja për dy familje të kësaj komune. Familja tre anëtarëshe Dushi në Gjakovë dhe familja njëmbëdhjetë anëtarëshe Zenuni në Novosellë tashmë gëzojnë shtëpitë e tyre të reja, plotësisht të sistemuara dhe me të gjitha kushtet e nevojshme për jetesë.
Ky projekt u bë i mundur falë mbështetjes institucionale, kontributeve të bizneseve, si edhe ndihmës së vazhdueshme të bamirësve nga vendi dhe diaspora.
Mirënjohje për të gjithë ata që kontribuan në sjelljen e gëzimit dhe shpresës në këto dy familje, pikërisht në prag të një date kaq domethënëse për kombin tonë.