Një ngjarje e pazakontë ka tërhequr vëmendjen gjatë një ndeshjeje të kampionatit francez Ligue 1, ku portieri i FC Nantes, Anthony Lopes, dyshohet se simuloi një lëndim për t'u krijuar mundësi bashkëlojtarëve të tij myslimanë të ndërprisnin për pak çaste lojën dhe të bënin iftar.
Portieri u ul në tokë duke shfaqur shqetësime në këmbë në një moment kur loja ishte aktive. Ndërhyrja e stafit mjekësor solli ndërprerjen e përkohshme të takimit.
Gjatë kësaj kohe, disa lojtarë që po agjëronin për muajin e Ramazanit shkuan pranë vijës anësore për të konsumuar ujë dhe ushqim të lehtë, duke përmbushur kështu iftarin pas perëndimit të diellit. Pak çaste më vonë, portieri u rikthye në këmbë dhe vazhdoi ndeshjen normalisht.
Ngjarja ka ngjallur diskutime të shumta në rrjetet sociale dhe në mediat sportive. Disa e kanë cilësuar veprimin si një gjest solidariteti dhe respekti ndaj bashkëlojtarëve, ndërsa të tjerë kanë ngritur pikëpyetje mbi etikën sportive të simulimit të një dëmtimi.
Në Francë, çështja e ndërprerjeve të lojës gjatë Ramazanit ka qenë temë debati edhe më herët. Federata franceze e futbollit nuk ka një rregull të posaçëm që detyron ndalimin e ndeshjes për iftar, ndryshe nga disa liga të tjera evropiane ku lejohen pauza të shkurtra simbolike.