Qeveria e Arabisë Saudite ka konfirmuar planet për ndërtimin e një aeroporti ndërkombëtar dhe një sistemi modern metroje në qytetin e shenjtë të Mekkës, një hap historik për përmirësimin e transportit për miliona muslimanë që vizitojnë qytetin çdo vit për Haxh dhe Umrah.
Lajmin e bëri të ditur Saleh Al-Rasheed, drejtuesi i Komisionit Mbretëror për Mekkën dhe vendet e shenjta. Ai theksoi se aeroporti do t'i shërbejë pelegrinëve duke lehtësuar udhëtimet, pasi deri më sot shumica mbërrijnë në King Abdulaziz International Airport pranë Jeddah.
Studimet e fizibilitetit dhe projekt-dizajnet për aeroportin janë përfunduar, por ende nuk është shpallur data e fillimit të ndërtimit. Aeroporti synon të ofrojë standarde ndërkombëtare dhe të mos ngarkojë infrastrukturën ekzistuese të qytetit.
Përveç aeroportit, Mekkës po i shtohet një sistem metroje urban, i cili do të zgjasë rrjetin ekzistues dhe do të përmirësojë lëvizjen e banorëve dhe pelegrinëve gjatë gjithë vitit. Linjat e reja dhe integrimi me transportin publik synojnë menaxhimin më të mirë të turmave dhe reduktimin e vonesave, duke bërë udhëtimin brenda qytetit më të shpejtë dhe më të sigurt.
Al-Rasheed gjithashtu njoftoi përmirësime të tjera në transport, përfshirë autobusë modernë, taksi me sisteme gjurmimi dhe pagesë elektronike, si dhe modele elektrike dhe hibride, të cilat janë pjesë e iniciativës "Meka Taxi".
Një tjetër nismë e rëndësishme është programi "Smart Meka", që përdor inteligjencën artificiale për të monitoruar dhe menaxhuar lëvizjen e turmave në Xhaminë e Madhe dhe zonat përreth. Sistemet parashikuese ndihmojnë në koordinimin e rrjedhës së turmave në Urën e Xhemaratit dhe zona të tjera qendrore, ndërsa imazhet ajrore dhe aplikacioni "Balady" ofrojnë informacion të drejtpërdrejtë për pelegrinët.
Të gjitha këto projekte janë pjesë e strategjisë kombëtare Vision 2030, që synon modernizimin e infrastrukturës, rritjen e turizmit dhe përmirësimin e qasjes në qytetet kryesore. Kur të përfundojnë, aeroporti dhe metroja do të transformojnë Mekkën në një qendër më të aksesueshme, moderne dhe të përshtatshme për miliona vizitorë çdo vit.
