Qendra e Mbretit Salman për Ndihmë dhe Punë Humanitare nënshkroi një program ekzekutiv të përbashkët me Bashkësinë Islame të Kosovës, për zbatimin e projektit të kujdesit ndaj jetimëve në 29 komuna të Kosovës për vitin 2026, nga i cili do të përfitojnë 700 jetimë.
Programin e nënshkroi së pari ndihmës-mbikëqyrësi i përgjithshëm i Qendrës për operacione dhe programe, inxhinier Ahmed bin Ali al Baiz, ndërsa pas tij nënshkroi Myftiu i Kosovës, Naim ef. Tërnava, në cilësinë e kryetarit të Bashkësisë Islame të Kosovës.
Menaxheri i projektit, Besim Mehmeti, njëherit shefi i kabinetit, njoftoi për ecurinë e deritanishme të programit dhe detajet e zbatimit të tij, duke theksuar se struktura e ndihmës do të përfshijë shpërndarjen e kujdestarive mujore për familjet e jetimëve, organizimin e udhëtimeve argëtuese, si dhe sigurimin e çantave shkollore dhe veshjeve dimërore për fëmijët përfitues në të gjitha komunat e përfshira në projekt.
Gjithashtu, ai njoftoi se numri i jetimëve përfitues ka njohur rritje të vazhdueshme: nga rreth 500 jetimë të mbështetur në periudhën 2024-2025, projekti pritet të arrijë tani në 700 përfitues për vitin 2026 - një shtim që reflekton zgjerimin e vazhdueshëm të mbulimit dhe rritjen e mbështetjes financiare të siguruar nga Qendra e Mbretit Salman.
Kjo vjen në kuadër të përpjekjeve humanitare dhe të ndihmës që ofron Mbretëria e Arabisë Saudite përmes krahut të saj humanitar, Qendrës së Mbretit Salman për Ndihmë, në bashkëpunim me Bashkësinë Islame të Kosovës.