Puna e madhe rizhvillimi ka nisur në xhaminë historike Quba të Medinës për të zgjeruar më tej vendin e shenjtë të ndërtuar për herë të parë nga Profeti Muhamed a.s., më shumë se 1,440 vjet më parë.

Në prill, gjatë Ramazanit, Princi i Kurorës Mohammed bin Salman njoftoi se xhamia do të dhjetëfishohej në madhësi si pjesë e një projekti të quajtur sipas mbretit Salman.

Pas përfundimit të zhvillimit më të madh në historinë e saj, Xhamia Quba do të jetë në gjendje të akomodoj më shumë se 66,000 besimtarë në një zonë që mbulon 50,000 metra katrorë.

Zona e saj aktuale e faljes mbulon 5,000 metra katrorë, me ndërtesën dhe objektet që zënë 13,500 metra katrorë dhe strehojnë maksimum 20,000 adhurues.

Xhamia Quba ndodhet 5 kilometra në jug të xhamisë së Profetit në Medine dhe është ndërtuar në vitin 622. Besohet se Profeti Muhamed falej shpesh në xhaminë Quba, veçanërisht të shtunave, dhe i nxiti shokët e tij ta bënin këtë.

Ekziston një hadith për xhaminë, ku Profeti Muhamed ka thënë: “Kush merr abdes në këtë shtëpi dhe fal një namaz në të, do të shpërblehet sa një umre”. Kjo është arsyeja pse xhamia mbetet e një rëndësie të konsiderueshme fetare dhe historike për muslimanët.

Ajo iu nënshtrua rinovimit gjatë epokave të kalifëve Uthman bin Affan dhe Omar ibn Al-Khattab. Ky i fundit ishte i pari që i shtoi strukturës një minare.

Gjatë epokës saudite, Xhamia Quba, së bashku me shtëpitë e tjera të adhurimit, u rigjallëruan rregullisht. Në vitin 1968, ana veriore e saj u zgjerua dhe më pas në 1985, Mbreti Fahd urdhëroi disa zgjerime duke ruajtur tiparet arkitekturore të rëndësishme historike të ndërtesës.