Shkenca bashkëkohore çdo ditë zbulon fakte që dëshmojnë urtësinë dhe vërtetësinë e mësimeve të të Dërguarit të Allahut, paqja dhe mëshira e Tij qoftë mbi të. Në këtë shkrim, do të ndalemi te një zbulim i ri shkencor që mbështet drejtpërdrejt një prej këshillave të tij të vyera.
I Dërguari i Allahut, paqja qoftë mbi të, ishte mëshirë për të gjitha botët. Ai udhëzoi me dije hyjnore, duke ofruar udhëzime që jo vetëm drejtojnë shpirtin, por edhe mbrojnë trupin dhe shëndetin tonë. Allahu i Madhëruar thotë në Kuran:
"Juve ju erdhi i dërguar nga lloji juaj, atij i vie rëndë për vuajtjet tuaja, sepse është lakmues i rrugës së drejtë për ju, është i ndijshëm dhe i mëshirshëm për besimtarët." (Teube, 128)
Pikërisht nga kjo mëshirë, Profeti e ndaloi mbajtjen dhe edukimin e qenve brenda në shtëpi, përveç rasteve të domosdoshme si për ruajtje, gjueti apo ndihmë në bujqësi. Ai i konsideroi qentë si krijesa që mbartin papastërti dhe rrezik për shëndetin, gjë që sot është duke u konfirmuar edhe nga shkenca moderne.
Studimet e fundit shkencore
Një studim bashkëkohor nga Universiteti i Mynihut në Gjermani tregoi një lidhje të mundshme mes mbajtjes së qenve në shtëpi dhe rrezikut të shtuar për zhvillimin e kancerit të gjirit. Studiuesit konstatuan se 80% e grave të prekura nga ky lloj kanceri kishin pasur qen në shtëpi dhe kishin qenë në kontakt të vazhdueshëm me ta.
Kjo lidhet me një virus të quajtur MMTV (Mouse Mammary Tumor Virus), i cili është zbuluar si një nga faktorët e mundshëm shkaktarë të kancerit të gjirit, dhe që mendohet se mund të transmetohet nga qeni tek njeriu përmes fërkimit apo kontaktit me jargët, qimet apo lëkurën e tij.
Përkundrazi, ky rrezik nuk është vërejtur te njerëzit që mbajnë mace në shtëpi. Studiuesit theksojnë se macet nuk mbartin virusin në fjalë dhe nuk e transmetojnë atë te njerëzit.
Për më tepër, është vënë re një përhapje më e madhe e këtij kanceri në vendet perëndimore - ku mbajtja e qenve si kafshë shtëpiake është e zakonshme - krahasuar me vendet lindore ku një praktikë e tillë është më e rrallë.
Papastërtia dhe rreziku mikrobik
Shkencëtarët kanë zbuluar se jargët, qimet dhe gjaku i qenve përmbajnë një numër të lartë mikroorganizmash, përfshirë viruse dhe baktere të rrezikshme për shëndetin e njeriut. Kjo është arsyeja pse Profeti, paqja qoftë mbi të, ka udhëzuar që nëse qeni lëpin ndonjë enë, ajo duhet të lahet shtatë herë, një herë prej të cilave me dhe, si formë e pastrimit të thellë dhe mbrojtjes nga rreziku.
Ky urdhër profetik, në atë kohë i pakuptueshëm për shumëkënd, sot merr kuptim të plotë përmes provave shkencore.
Përfundim
Besimtari e di se çdo urdhër i të Dërguarit të Allahut ka një urtësi. Edhe pse ndonjëherë kjo urtësi nuk zbulohet menjëherë, koha gjithmonë e dëshmon të vërtetën. Ndalimi i mbajtjes së qenve në shtëpi nuk është një urdhër i rastësishëm, por një masë mbrojtëse për trupin, shëndetin dhe pastërtinë e mjedisit familjar.
Le të jemi mirënjohës për udhëzimet profetike që janë jo vetëm rrugë drejt Xhenetit, por edhe mburojë në këtë botë. E gjithë lavdia i takon Allahut, që e dërgoi Muhamedin (paqja qoftë mbi të) si mëshirë për të gjitha krijesat.